კვება შაქრიანი დიაბეტის დროს

კვებას, უმნიშვნელოვანესი ადგილი უჭირავს დიაბეტის მკურნალობაში ინსულინთან და თვითკონტროლთან ერთად. ისტორიული დროიდან კვებითი რეკომენდაციები დიაბეტიანი ადამიანებისთვის იყო სხვადასხვა. საინტერესოა, რომ თვიდან დიაბეტის სამკურნალოდ სთავაზობდნენ ნახშირწყლებით მდიდარ საკვებს, რადგან ფიქრობდნენ ამით შეივსებოდა ის გლუკოზა, რომელსაც კარგავდა ორგანიზმი შარდთნ ერთად. შემდეგ კი პირიქით, დიაბეტის მთავარ მიზეზად ნახშირწყლების მიღებას თვლიდნენ და შაქრისშემცველ პროდუქტებს საერთოდ იღებდნენ დიეტიდან. მაგრამ, ეს უკვე დაძველებული მეთოდებია და დღეს დიაბეტის მკურნალობაში ინსულინის დანერგვის წყალობით, შესაძლებელი გახდა ჯანმრთელი ადამიანის რაციონის მსგავსი საკვების მიღება. ამიტომაც, დიაბეტიან ბავშვებს შეუძლით თითქმის ყველაფერი მიირთვან, თუ მათ ეცოდინებათ პროდუქტებში შემავალი ნახშირწყლების რაოდენობა. ზოგადად, ნებისმიერმა ადამიანმა უნდა გაითვალისწინოს დიაბეტიანი ადამიანების კვების მოდელი, თუ სურს იცხოვროს ჯანმრთელი ცხოვრების წესით და დიდხანს შეინარჩუნოს ფიზიკური და სულიერი სიმხნევე.

კვების ძირითადი პრინციპები კი ასეთია:

 დიეტა ფიზიოლოგიურად დაბალანსებული უნდა იყოს, ცილების, ცხიმების და ნახშირწყლების ასაკთან შესაბამისი თანაფარდობით;

 კვების საერთო კალორაჟი უნდა იყოს ადეკვატური ბავშვის ასაკთან;

 საკვებმა უნდა დააკმაყოფილოს ორგანიზმის მოთხოვნა ვიტამინებით, მინერალური და ბიოლოგიურად აქტიური ნივთიერებებით;

 აუცილებელია ნორმალური ზრდის ტემპის და წონის შენარჩუნება, ბავშვის ინტელექტუალური განვითარების უზრუნველყოფა;

 კვება უნდა იყოს სამჯერადი: საუზმე, სადილი, ვახშამი და მათ შორის წახემსებები ხილის, ბოსტნეულის სახით (პურის გარეშე);

 ნახშირწყლების სახე და რაოდენობა უნდა იყოს შერჩეული ისე, რომ თავიდან ავიცილოთ გლუკოზის მკვეთრი მერყეობა;

 აუცილებელია საკვების რეგულარული მიღება და კვების რეჟიმის მკაცრი დაცვა, რადგან მოუწესრიგებელი კვების დროს ძნელია გლიკემიის მართვა. თუ ინექციის შემდეგ კვება დაგვიანდა, შეიძლება შაქრის დონე სისხლში მკვეთრად დაეცეს და განვითარდეს ჰიპოგლიკემია;

 ბავშვს უნდა შეეძლოს მიღებული საკვების რაოდენობის გამოთვლა პურის ერთეულების სისტემის მიხედვით (განვიხილავთ დაბლა);

 უნდა იცოდეს სხვადასხვა სახის ექვივალენტური პროდუქტების ჩანაცვლება, რათა თავისუფლად შეძლოს საკვების მიღება სახლის გარეთ;

 შეძლებისდაგვარად საჭიროა კვების მორგება ბავშვის კვებასთან და არა მისთვის კერძის ცალკე მზადება;

დიაბეტიანი ბავშვების დიეტა მიზნად ისახავს ცილების, ცხიმების და ნახშირწყლების ნორმასთან მიახლოებულ თანაფარდობას:

ნახშირწყლები – 50-60 % ;

ცილები – 15-20 %;

ცხიმები – 25–30 %;

ცილები

ცილა – ორგანიზმში მიმდინარე ყველა პროცესში მონაწილეობს. იგი არის უჯრედების საშენი მასალა, ძვლოვანი და კუნთური მასის საფუძველი, უზრუნველყოფს ორგანიზმის იმუნიტეტს. სწორედ ამიტომ, აუცილებელია ბავშვმა მიიღოს ცილების საკმარისი რაოდენობა შემდეგი პროდუქტების სახით: ცხოველური ცილები (ხორცი, თევზი, ზღვის პროდუქტები, კვერცხი, რძე და რძის პროდუქტები), მცენარეული ცილები (ბარდა, ლობიო, ნიგოზი, სოკო).